Bíll ársins er Peugeot 3008

Tilkynnt var um val á bíl ársins hjá Bandalagi íslenskra bílablaðamanna í gærkvöldi. Það var Peugeot 3008 sem hlýtur nafnbótina Bíll ársins að þessu sinni.

Alls voru það 30 bílar sem valið stóð á milli þetta árið, en gjaldgengir eru glænýjar bílgerðir og nýjar kynslóðir þekktari gerða.

Tólf þeirra voru valdir í úrslit í fjórum flokkum, það er minni fólkbílar, millistærðarfólksbílar, stærri fólksbílar og jeppar og jepplingar.

Peugeot 3008 fellur í flokk stærri fólksbíla, en annar í þeim flokki var Volvo V90 Cross Country og þriðji BMW 5. Í flokki smærri fólksbíla stóð Suzuki efstur á blaði, annar var Nissan Micra og þriðji Kia Rio.

Í flokki millistærðarfólksbíla varð efstur Hyundai Ionic, annar Honda Civic og þriðji Hyundai i30. Í flokki jeppa og jepplinga bar sigur úr bítum Volvo XC60, annar varð Skoda Kodiaq og þriðji Renault Koleos. Allra hæstu einkunn allra þessara bíla hlaut Peugeot 3008. Næst flestu stigin fékk svo Hyundai Ionic og þau þriðju flestu Volvo XC60.

Verðlaun fyrir bíl ársins, sem og fyrir fyrstu þrjú sætin í hverjum flokki voru veitt með viðhöfn í sal Blaðamannafélagsins í Síðumúla í gærkveldi að viðstöddu fjölmenni.

Á myndinni eru fulltrúar frá Peugeot kampakátir með stálstýrið sem fylgir útnefningunni á bíl ársins. Frá vinstri er Þórður Jónsson, framkvæmdastjóri viðskiptasviðs Peugeot, Citröen og Mazda hjá Brimborg, Özur Lárusson, framkvæmdastjóri Bílgreinasambandsins, Jón Vikar Jónsson, sölustjóri hjá Brimborg, og Jóhannes Reykdal hjá Bandalagi íslenskra blaðamanna.