Al-Attyah og Tina Thörner rekin úr keppni

Tina Thörner og Al-Attyah við upphaf Dakarrallsins.

BMW-ökumaðurinn knái Nasser Al Attiyah og Tina Thörner aðstoðarökumaður hans eru fallin úr keppni í Dakarrallinu eftir að hafa veitt keppninni forystu um skamma hríð. Þau höfðu staðið sig afar vel en ýmislegt fór úrskeiðis hjá þeim í gær. Seint í gærkvöldi felldu svo dómarar keppninnar þann úrskurð að fella þau úr keppni.

Fyrir rúmum tveimur dögum  tók að bera á vélarbilun í keppnisbíl þeirra sem er BMW X3 CC. Vélin tók þá upp á því að hitna. Á sérleið gærdagsins færðist bilunin í aukana en grunur leikur á að sprunga sé í heddi vélarinnar sem valdi þessu. Eftir fárra kílómetra akstur tók vélin að hitna mjög. Kafli sérleiðar gærdagsins lá um mjög erfiða eyðimerkursandhóla og –öldur og í stað þess að aka þar um tóku þau Al-Attyah og Törner á það ráð að krækja fyrir mestu torfæruna, en við það misstu þau af fimm leynilegrum eftirlitsstöðvum og það gerði útslagið.

Suðurafríkubúinn Giniel de Villiers á Volkswagen náði besta tímanum á sérleið gærdagsins  og Bandaríkjamaðurinn Mark Miller, einnig á Volkswagen, öðrum besta tíma. Í þriðja sæti varð Carlos Sainz á Volkswagen. Staðan í keppninni eftir gærdaginn er þessi:

Sæti                Keppendur                                            Teg.       Tími        Frávik        

1.   DE VILLIERS (S.Afr)/ VON ZITZEWITZ (Þýs.)       VW     20:59:34   00:00:00
2.  SAINZ (Sp.) / PERIN (Fr.)                                         VW     21:07:13   00:07:39
3 .  MILLER (USA) / PITCHFORD (S. Afr.)                   VW     21:17:25   00:17:51
4.   ROMA (Sp.) / CRUZ SENRA (Sp.)            MITSUBISHI    21:30:52   00:31:18
5.   PETERHANSEL (Fr.) / COTTRET (Fr.)     MITSUBISHI    21:34:01   00:34:27    

Alls verða eknir í dag 816 km til vesturs yfir Andesfjallgarðinn og niður á vesturströnd Chile.