Fréttir

Umferðin um Suðurstrandarveg eftir að hann opnaði eftir að gos hófst í Geldingadölum 19. mars jókst um nærri 500 prósent. Einnig hefur veirð mikil aukning á umferð um Grindavíkurveg og Reykjanesbraut þær fjórar vikur sem gosið hefur staðið og skýrist af gríðarlegur áhuga á að heimsækja gosstöðvarnar.

Mercedes-Benz heimsfrumsýndi hinn nýja rafbíl EQB um helgina. EQB er hreinn rafbíll og fimmti bíllinn sem Mercedes-Benz kynnir á stuttum tíma undir merkjum Mercedes-EQ. Nú á dögunum voru bæði EQA og EQS frumsýndir. Fyrsti rafbíll Mercedes-Benz var EQC, þá kom fjölnotabíllinn EQV og enn fleiri bílar undir merkjum EQ eru væntanlegir á næstunni m.a. EQE, sem og jeppaútfærslur af EQE og EQS.

Tími nagladekkjanna er liðin en samkvæmt reglugerð er óheimilt að nota nagladekk á tímabilinu frá 15. apríl til og með 31. okt. Því er sá tími runninn upp að bíleigendur verða að skipta yfir á óneglda hjólbarða. Í sömu reglum er þó undanþáguákvæði sem heimilar að nota neglda hjólbarða ef þess er þörf vegna akstursaðstæðna.

Umferðin á Hringvegi í mars jókst um nærri 23 prósent frá mars í fyrra en þá hafði kórónufaraldurinn dregið mjög mikið úr umferð. Frá áramótum hefur umferðin aukist um sjö prósent og frá áramótum er aukning í öllum landssvæðum utan Suðurlands þar sem umferð dregst saman. Má það væntanlega rekja til samdráttarins í ferðamennskunni.

Færð og veður – beint í bílinn var heiti morgunfundar Vegagerðarinnar sem var í beinu streymi í morgun. Þar var kynnt hvernig upplýsingar um færð og ástand vega verða gerðar aðgengilegar alþjóðlegum leiðsöguþjónustum en Vegagerðin hefur nú hafið útgáfu þessara upplýsinga á DATEXII (Datex2) staðli Evrópusambandsins.

Í vikulegu fréttabréfi borgarstjórans í Reykjavík kemur fram að lækkun hraða innan borgarmarkanna geti skapað allt að 40% samdrátt í magni svifryks ef keyrt yrði á 30 km hraða í stað 50 km. Fram kemur í fréttabréfi borgarstjórans að þetta séu mikilvægar upplýsingar og eiga að leggja grunn að frekari hraðalækkunum innan borgarinnar eins og aðrar borgir sem við berum okkur saman við eru að gera.

Umferðin á höfuðborgarsvæðinu í mars var miklu meiri en hún var í sama mánuði fyrir ári síðan, eða nærri 25 prósentum meiri. En hinsvegar rúmu prósenti minni en árið 2019. Heldur meiri takmarkanir voru í gangi stærstan hluta mars í fyrra en í ár. Draga má þá ályktun að Íslendingar séu farnir að aðlagast ástandinu og umferðin taki mið af því, meiri en í byrjun faraldurs en heldur minni en fyrir hann að því fram kemur í tölum frá Vegagerðinni.

Forstjóri Vegagerðarinnar og framkvæmdastjóri Suðurverks hf. rituðu undir verksamning um þverun Þorskafjarðar á Vestfjarðavegi (60) um Gufudalssveit fimmtudaginn 8. apríl. Verkið felur í sér þverun Þorskafjarðar og er liður í lúkningu umfangsmikillar vegagerðar á sunnanverðum Vestfjörðum undanfarin ár. Suðurverk hf. átti lægsta tilboðið í verkið.

Tesla Model 3 var söluhæsti rafbíllinn á síðasta ári en þessi tegund seldist í tæplega þrjú hundruð þúsund eintökum. Þetta er þriðja árið í röð sem Tesla Model 3 trónir í efsta sætinu og er uppgangur fyrirtækisins einstakur.

Samdráttur í nýskráningum fólksbíla nam 15,8% fyrstu þrjá mánuði ársins saman borið við sömu mánuði á síðasta ári. Nýskráningar voru alls 2.089 bifreiðar. Þess má geta að nýskráningar í mars einum voru 956 sem er 11,3% færri skráningar en í sama mánuði í fyrra samkvæmt upplýsingum frá Bílgreinasambandinu.