Brunahreyfill með 57% orkunýtni

Við tækniháskólann í Lundi í Svíþjóð er verið að taka í notkun nýja mjög fullkomna rannsóknastöð til að vinna að þróun ofursparneytinna og orkunýtinna bílvéla. Í nýju stöðinni verður áfram unnið að nýrri vél sem nú þegar er sú orkunýtnasta sem um getur hingað til. 57 prósent orkunnar í eldsneytinu sem hún brennir nýtast og verða að afli.

Nýtni brunahreyfla í bílum hefur batnað mjög síðustu ár og áratugi og eru vélarnar nýtnari á eldsneytið en nokkru sinni fyrr. Algengt er að nýtingarstuðull bensínvéla sé rúmlega 30 prósent og dísilvélanna um 45 prósent. Til samanburðar er nýtni rafmótora verulega hærri eða um og yfir 90 prósent. Þessi mikla nýtni vélanna hefur oft þau hliðaráhrif að lægra hlutfall orkunnar í eldsneytinu fer í það að búa til afgangsvarma til að hita fólksrými bílsins upp þegar veður eru köld. Þessvegna eru oft kalt í nýjustu bílunum þegar frosthörkur geisa.

Sú ofurnýtna (og þar með sparneytna) vél sem tæknifólkið í Lundi er að þróa er upphaflega dísilvél sem breytt hefur verið þannig að hún geti gengið á bensíni. Vél þessi sameinar og nýtir helstu kosti bensín- og dísilvéla og hefur þegar náð hæsta orkunýtingarhlutfalli sem um getur – 57 prósentum.

Óvíst hvenær þessi ofurnýtna vél birtist í nýjum bílum. Tilraunum og þróunarvinnu á rannsóknastofu er ekki lokið en þegar það gerist verða væntanlega smíðaðar nokkrar fumgerðir sem reynsluekið verður við margvíslegar aðstæður í daglegri notkun. Það gætu því verið enn 3-6 ár í það að vélar af þessari gerð verði valkostur í nýjum bílum.