Buddan réði

Rick Scott ríkisstjóri í Florida hefur undirritað lög sem afnema nýleg lög frá 2012 sem gerðu öllum útlendingum skylt að framvísa alþjóðlegu ökuskírteini til að mega aka bíl í ríkinu. Ökuskírteinislögin voru sett á síðasta ári en gildistöku þeirra var frestað eftir hávær mótmæli frá m.a. stjórnvöldum í Kanada. Kanadamenn eru mjög fjölmennir meðal þeirra sem dvelja langdvölum í Forida á vetrum.

Viðstaddir staðfestingu nýja laganna sem felldu ökuskirteinislögin úr gildi voru m.a. fulltrúar kanadíska bifreiðaeigendafélagsins CAA og hins bandaríska, AAA. Eftir að hafa staðfest nýju lögin sagði ríkisstjórinn að Florida væri staðráðið í að verða öflugasta ferðamannasvæði heims og ökuskírteinislögin hefðu stefnt þeim fyrirætlunum í tvísýnu. Nú væri búið að vinda ofan af því og þúsundir starfa í ferðageiranum ekki lengur í hættu. Ferðamenn hvaðanæva úr heiminum gætu nú eins og áður komið til Florida og leigt sér þar bíla og ekið að vild um ríkið á þeim eða á eigin bílum á ökuskírteini eigin lands.

AAA, samtök bandarískra bifreiðaeigenda fagna afnámi ökuskírteinislaganna og hversu fljótt löggjafarvaldið í Forida brást við. Nú gætu Kanadamenn og aðrir íbúar norðlægra landa dvalið á Florida og haldið áfram að kalla ríkið sitt vetrar-heimaland, ekið um að vild, öruggir um að lenda ekki í útistöðum við lögreglu og dómsvald fyrir að vera án alþjóðlegs ökuskírteinis. Óvissunni sem ökuskírteinislögin sköpuðu hefði verið eytt.

Sendifulltrúar Bretlands, Þýskalands og Ítalíu sem viðstaddir voru afnám ökuskírteinislaganna tóku í sama streng og talsmaður AAA. Breski sendiherrann sagði að nú þyrftu þeir 1,5 milljón Bretar sem árlega dvelja á Florida ekki að óttast neinar truflanir á ferðum sínum þar og svipað sögðu hinir sendifulltrúarnir.

Afnám þessara umdeildu ökuskírteinislaga í Florida hefur sömu þýðingu fyrir Íslendinga eins og aðra Evrópubúa. Þeim verður ekki lögskylt að framvísa alþjóðlegu ökuskírteini ef lögregla biður um ökuskírteini, eða þegar tekinn er bílaleigubíll. En annað mál er að alþjóðlegt ökuskírteini er í raun þýðing á þeim réttindum sem ökuskírteini veitir og sérstakir alþjóðasamningar um þau eru í gildi. Íslenska ökuskírteinið er hins vegar eitt og sér fullgilt allsstaðar á evrópska efnahagssvæðinu. Utan þess, m.a. í mörgum ríkjum Bandaríkjanna og í Asíu og Eyjaálfu er alþjóðlegt ökuskírteini hins vegar nauðsynlegt fylgigagn, hyggist maður ferðast akandi.   (Heimild: FIA)