Dómstóll í Þýskalandi úrskurðar að takmörkun á aðgengi að bílagögnum brjóti í bága við lög

Efri héraðsdómstóllinn í Köln (HRCC) staðfesti þann 17. janúar sl. dóm sem féll fyrirtækinu Carglass í vil í máli gegn bílaframleiðandanum Stellantis. Dómurinn komst að þeirri niðurstöðu að bílaframleiðendum væri óheimilt að takmarka aðgang óháðra viðgerðaraðila að tæknigögnum ökutækja, það væri ólöglegt og bryti í bága við evrópsk samkeppnislög.

Málið á rætur að rekja til kæru frá Carglass, sem sérhæfir sig í viðgerðum og skiptum á bílrúðum, gegn Stellantis (Peugeot, Citroën, Opel, Fiat og Chrysler m.m.) sem hefði markvist takmarkað aðgang sjálfstæðra viðgerðarverkstæða að nauðsynlegum gögnum úr tölvukerfum ökutækja. Þessar takmarkanir hindri samkeppni og veiti umboðsaðilum Stellantis ósanngjarnt forskot á markaði.

Ökutækisframleiðendur hafa í auknum mæli takmarkað aðgang að gögnum ökutækja með tæknilegum hindrunum eins og öruggum gáttum. Þessi vinnubrögð auka kostnað óháða viðgerðaraðila og hindra frjálsa samkeppni á eftirmarkaði. Þetta takmarkar val neytenda og hækkar þjónustu- og vöruverð.
Dómstóllinn tók undir röksemdir Carglass og úrskurðaði að framleiðendur ökutækja yrðu að tryggja frjálsan og sanngjarnan aðgang að bílgögnum í samræmi við reglugerðir Evrópusambandsins. ,,Þetta er sigur fyrir neytendur og sjálfstæð viðgerðarverkstæði, sem nú fá betri möguleika til að veita þjónustu á sanngjörnum forsendum," sagði talsmaður Carglass eftir úrskurðinn.

Stellantis lýsti yfir vonbrigðum með niðurstöðuna og gaf út yfirlýsingu þar sem fram kom að fyrirtækið myndi íhuga næstu skref, þar á meðal möguleika á áfrýjun til sambandsdómstólsins í Þýskalandi. "Við trúum því að stefna okkar varðandi aðgang að ökutækjagögnum sé í samræmi við lög og reglur og muni halda áfram að vernda öryggi og gæði þjónustu fyrir okkar viðskiptavini," sagði talsmaður Stellantis í yfirlýsingu.
Úrskurðurinn hefur víðtækar afleiðingar fyrir bílaiðnaðinn í Evrópu, þar sem mörg sjálfstæð verkstæði hafa lengi barist fyrir auknum aðgangi að bílgögnum. Evrópusambandið hefur ítrekað þrýst á bílaframleiðendur að veita jafnan aðgang að þessum upplýsingum, en margir framleiðendur hafa fundið leiðir til að takmarka aðgang með tæknilegum hindrunum.

Nú þegar HRCC hefur úrskurðað í málinu gæti dómurinn haft fordæmisgildi í öðrum sambærilegum málum innan Evrópu, þar sem fleiri fyrirtæki í viðgerðarþjónustu gætu leitað réttar síns gegn bílaframleiðendum sem takmarka aðgang að gögnum. Sérfræðingar telja að niðurstaðan gæti einnig haft áhrif á framtíðarskipan reglna um aðgang að bílaupplýsingum innan Evrópusambandsins.

Málið er því stórsigur fyrir Carglass og önnur sjálfstæð verkstæði, sem telja að þessi úrskurður marki mikilvægt skref í átt að auknu gagnsæi og sanngjarnri samkeppni í bílaiðnaðinum.
Fréttin byggir á gögnum frá FIA í Brussel.