Er svindl-forrit í þínum bíl?

Áhyggjufullir eigendur bíla  frá VW, Audi og Skoda  geta nú sjálfir gengið úr skugga um hvort bílar þeirra eru meðal þeirra 3.647 bíla á Íslandi sem forritaðir eru með hugbúnaði til að fegra niðurstöður útblástursmælinga. Volkswagen hefur opnað almennan aðgang að leitarvél þar sem slá má inn auðkennisnúmer eða vin-númer VW bíls  og fengið strax svar við því hvort bíllinn er með hugbúnaðinn alræmda eða ekki. Hið sama hafa ýmsir aðrir gert, eins og mörg systurfélög FÍB og fjölmiðlar.

FDM, systurfélag FÍB í Danmörku hefur opnað slíkar leitarvélar fyrir hverja bílategund Volkswagen samsteypunnar um sig. Þegar smellt er á tegundarheitið opnast gluggi. Þegar slegið er inn í gluggann vin-númer bíls, flettir leitarvélin í gagnagrunni framleiðandans og svarið fæst á augnabliki:

Falshugbúnaðinn er að finna í dísilbílum sem byggðir eru til að standast kröfur mengunarstaðalsins Euro-5. Þeir eru af árgerðum 2008-2015. Þær dísilvélar sem um ræðir eru samkvæmt nýjustu upplýsingum VW 1,2 l, 1,6 l og 2,0 l dísilvélar. Þær fyrirfinnast í bílum af tegundunum Volkswagen, Audi, Skoda og Seat. Eftir því sem næst verður komist er enginn Seatbíll með þessum hugbúnaði hér á landi en Volkswagenbílar eru sagðir 1.129, VW sendibílar eru 348, Audibílar eru 316 og Skodabílar eru 1.845.

En hér eru tenglarnir:

Volkswagen

Audi

Skoda

Seat

Volkswagen AG tilkynnti í sl. viku að í smíðum væri vinnuáætlun um að eyða hinum ólöglega hugbúnaði úr bílunum. Í tilkynningu VW segir að haft verði beint samband og samráð við eigendur bílanna umræddu um hvernig að því verður staðið. 

Vin-númer bílanna er að finna undir neðri brún framrúðunnar og/eða í skráningarskírteini bílsins.