Miklar auknar álögur - of langt gengið eins og þetta er lagt fram núna

Bifreiðakostnaður landsmanna hækkar verulega á næsta ári þegar bensín- og kolefnisgjöld hækka, bifreiðagjald hækkar, nýtt gjald verður sett á rafmagnsbíla og vegtollar koma til framkvæmda. Runólfur Ólafsson, framkvæmdastjóri Félags íslenskra bifreiðaeigenda, FÍB segir þetta alltof langt gengið. 

Eins og fram hefur komið var fjárlagafrumvarp ríkisstjórnarinnar kynnt í gær. Það gerir ráð fyrir að bensín-, olíu-, kolefnis-, bifreiða- og kílómetragjald hækki á næsta ári.

„Við erum að sjá það að miðað við fjárlögin 2022 þá ætlar ríkið sér að taka yfir 36 prósent í auknar tekjur af bifreiðagjaldi milli ára. Og síðan kemur þetta með nýjar álögur á bæði bensín og dísil. Miðað við það sem er framlagt í frumvarpinu þá má gera ráð fyrir að hækkun bensíngjalda og skatta á bensín þýði hækkun upp á átta og hálfa krónu um það bil á bensíni og 7,60 á dísilolíuna,ׅ“ segir Runólfur Ólafsson í viðtali á RÚV.

Þetta fari beint út í verðlagið og bitni mest á þeim sem minnst hafa. Og síðan sé það hækkun eldsneytislítrans og önnur gjöld sem ekki séu tíunduð sérstaklega í fjárlagafrumvarpinu. 

„Þetta er að gerast á sama tíma og innviðaráðherra er að tala um stóraukna nýja skattheimtu af notkun almennings af bifreiðum með svokölluðum vegtollum í göngum, yfir brýr og svo framvegis.“

Rafmagnsbílar hækka í verði

Enn fremur verður fullur afsláttur vegna rafmagnsbíla úr sögunni vegna nýs fimm prósenta lágmarksvörugjalds sem sett verður á alla bíla. 

„Bara miðað við það sem kemur til framkvæmda núna um áramótin myndi það þýða hækkun á venjulegum rafbílum upp á um 600 þúsund upp í eina milljón. Síðan emur til viðbótar kvótaþakið og þá gæti það tvöfaldað þessa upphæð,“ segir Runólfur. 

„Þetta minnir á gamla sögu þegar bifreiðagjaldið var lagt á sem bráðabirgðaskattur í eitt ár og hefur núna verið við lýði í tæplega 30 ár. Þetta eru gríðarlega miklar auknar álögur sem eru boðaðar í einu vetfangi og við teljum að þetta sé allt of langt gengið eins og þetta er lagt fram núna.“