Misráðið að fella niður leyfin – færir okkur aftur um 30 ár

Félag ís­lenskra bif­reiðaeig­enda (FÍB) og Bíl­greinasa­mbandið (BGS) gagn­rýna áform at­vinnu­vega- og ný­sköp­un­ar­ráðuneyt­is­ins að fella niður skil­yrði um leyf­is­veit­ing­ar fyr­ir sölu notaðra öku­tækja, þ.m.t. kröfu um nám­skeið og próf fyr­ir bíla­sala í sam­eig­in­legri um­sögn.

Til­lag­an er hluti af aðgerðaáætl­un ráðuneyt­is­ins um ein­föld­un reglu­verks í stjórn­sýsl­unni en FÍB og BGS telja þetta afar mis­ráðið. Verði þess­ir skil­mál­ar af­numd­ir sé ekk­ert sem komi í veg fyr­ir að svika­hrapp­ar hasli sér völl á þess­um markaði og fari sínu fram, líkt og raun­in hafi verið í ná­granna­lönd­un­um. Velta í sölu notaðra öku­tækja hér á landi ár hvert er á bil­inu 60-80 millj­arðar. Þetta kemur fram í umfjöllun um málið í Morgunblaðinu í dag.

Fram kemur einnig að alls hafa 93 fyrirtæki í dag leyfi til sölu notaðra ökutækja, þar af 72 á höfuðborgarsvæðinu. Hjá þeim starfa á fjórða hundrað sölumanna sem hafa setið löggildingarnámskeið fyrir bílasala og staðist próf.

Áform um afnám yfir þúsund reglugerða og stórátak í einföldun flókins regluverks í stjórnsýslunni, sem Þórdís Kolbrún R. Gylfadóttir, ferðamála-, iðnaðar- og nýsköpunarráðherra, og Kristján Þór Júlíusson, sjávarútvegs- og landbúnaðarráðherra, kynntu í vikunni felst að stórum hluta í förgun á úreltu regluverki. En þegar fella á niður fjölda reglugerða kann það að hafa afleiðingar og mæta andstöðu.

Á Norðurlöndunum sem annars staðar í Evrópu er mikil umræða um hvernig koma megi böndum á óviðunandi ástand í viðskiptum með ökutæki.  Fagaðilar í Evrópu hafa horft sérstaklega á ,,íslenska módelið“ sem ákjósanlega leið til að bæta viðskiptasiðferði og neytendavernd í bílaviðskiptum. Á sama tíma telur ráðherra viðskipta- og neytendamála rétt að fella gæða- og neytendakröfur brott úr íslenskri löggjöf.

Núverandi stöðu þessara mála er ágætlega lýst í skýrslu starfshóps á vegum forsætisráðherra um eflingu trausts á stjórnmálum og stjórnsýslu sem var skilað í september 2018.  Á blaðsíðu 10 í skýrslunni segir m.a.:  „Viðskipti af ýmsu tagi, svo sem fasteignaviðskipti, bílaviðskipti og þess háttar, fara fram í andrúmslofti trausts þar sem fólk virðist litlar áhyggjur hafa af því að það verði hlunnfarið ef það gætir sín ekki.“

Þrátt fyrir þessa niðurstöðu um heilbrigt andrúmsloft í bílaviðskiptum þá boðar neytendaráðherra í þessari sömu ríkisstjórn niðurrif á einföldu kerfi sem fulltrúar atvinnulífsins og neytenda vilja efla frekar en rífa niður.  Getur verið að ekki hafi verið haft samráð um þetta í ríkisstjórn Katrínar Jakobsdóttur?

Runólfur Ólafsson, framkvæmdastjóri Félags íslenskra bifreiðaeigenda, FÍB, var í viðtali á Reykjavík síðdegis á Bylgjunni um þessi áform ráðuneytisins. Viðtalið við Runólf má nálgast hér.