Opel Adam náði ekki 5. stjörnunni

Euro NCAP hefur nú árekstursprófað fimm nýja bíla. Fjórir fengu fullt hús eða fimm stjörnur. Sá fimmti, Opel Adam,  má láta sér nægja fjórar. Þrír þessara bíla eru fáanlegir á Íslandi um þessar mundir. Þeir eru Maxda 6, Lexus IS og Toyota Corolla. Mitsubishi Space Star/ Mirage og Opel Adam hafa ekki verið  á íslenska nýbílamarkaðinum.

Þótt lífsstílsbíllinn Opel Adam, sem dregur nafn sitt af stofnanda Opel,  nái ekki fimmtu stjörnunni þá munar vissulega ekki miklu, eða einungis einu stigi af 100 í heildareinkunn allra prófunarþáttanna. Til að fá fimmtu stjörnuna verða bílar að ná minnst 80 stigum af 100 í samanlögðum prófunarþáttum. Opel Adam náði 79 stigum. Stigið einasta eina sem vantaði var í prófunarþáttunum sem lúta að öryggi barna og fótgangandi.

Mazda 6, Lexus IS og Toyota Corolla eru þessa dagana í forvali Bandalags ísl. bílablaðamanna á bíl ársins 2014. Í þessu forvali verður einn bíll úr hverjum stærðar- og gerðarflokki valinn. Úrslitabílarnir verða síðan teknir til sérstakrar skoðunar og sá bíll sem flest stig hlýtur í því verður útnefndur bíll ársins síðar í þessum mánuði.