Rekstur bílsins sífellt dýrari og dýrari

Kostnaður vegna bifreiðareksturs og notkunar hefur hækkað mikið  á liðnum misserum.  Öll finnum við fyrir gríðarlegum hækkunum á eldsneytisverði.  Bensínlítrinn er tæpum 40 krónum dýrari um þessar mundir samanborið við verðið fyrir ári síðan og dísillítrinn er 40 krónum dýrari.  Þetta stafar aðallega af miklum hækkunum á heimsmarkaði, veikri íslenskri krónu og skattahækkunum stjórnvalda.

 Aðrir útgjaldaliðir vegna bifreiðaeignar hafa einnig hækkað hressilega.  Nýjustu neysluvísitölumælingar Hagstofunnar sýna að kostnaður vegna þjónustu hjólbarðaverkstæða hefur hækkað um 18,1%  og smurstöðva um 15,9% á einu ári.  Talan vegna hjólbarðaþjónustu er sláandi há m.a. í ljósi þess að viðgerðar- og viðhaldsþjónusta hefur hækkað um 6,2% á sama tíma.  Liðurinn hjólbarðar og fl. hefur hækkað um 9% en varahlutir og fl. Um 4,8% á sama tíma.

Hjólbarðaþjónustuaðilar geta ekki réttlætt þessa miklu hækkun á sinni þjónustu með launaþróun þannig að nærtækasta skýringin er hærri álagning og hugsanlega áhrif af nýlegri yfirtöku banka, lífeyrissjóða og fjármálastofnana á stærstu fyrirtækjunum í þessum geira.

Heildarhækkun vísitölu bifreiðakostnaðar er 12,6% samanborið við október 2010 og þar vegur eldsneytið þyngst.  Nýir bílar hafa hækkað um 5% samkvæmt vísitölunni en vog þeirra í bifreiðakostnaðinum er 45,8%.