Renault og Caterham

Renault og breska sportbílasmiðjan Caterham sendu frá sér tilkynningu fyrr í dag að þeir hefðu sameinast um að byggja nýja sportbíla sem eiga að vera fisléttir en með bestu hugsanlegu aksturseiginleika slíkra bíla. Léttleiki, afturhjóladrif og minnst 200 hestöfl í hverjum bíl, sé sú lína sem unnið er eftir.

Renault Alpine árg. 1970. Hin myndin með þessari frétt er af Caterham Seven.

Fyrsta gerðin sem verður ávöxtur samstarfsins hefur fengið nafnið Alpine. Hann mun verða byggður í tveimur útgáfum sem koma á markað 2015-2016. Alpine verður tveggja sæta sportvagn. Hann verður byggður að mestu úr áli og koltrefjaefnum. Sameiginleg tækni- og hönnunardeild Caterham og Renault hefur verið sett á stofn og verksmiðjan þar sem framleiðslan verður er í Dieppe, Frakklandsmegin við Ermarsundið.

Carlos Ghosn forstjóri Renault-Nissan segir í fréttatilkynningu að þetta séu gleðilegar fyrirætlanir því að hjá Renault hafi menn lengi dreymt um að skapa verðugan arftaka hins sigursæla sport- og keppnisbíls, Renault Alpine frá sjöunda áratuginum.