Sænskur hæstaréttardómur um ábyrgðarskilmála Kia Motors

Hæstiréttur Svíþjóðar hefur staðfest dóm sænsks verslunardómstóls frá 2012 í máli sem sem snerist um það hvort Kia Motors Sweden AB væri heimilt að skilyrða sjö ára framleiðandaábyrgð á Kia bílum við það að einungis þjónustuaðilar Kia þjónustuðu bílana á ábyrgðartímanum og að þeir notuðu einungis svokallaða „original“ íhluti.
Þetta kærðu óháðir íhlutaframleiðendur og þjónustuaðilar og komst verslunardómstóllinn og nú hæstiréttur að þeirri niðurstöðu að skilyrðing Kia væri ólögleg. Kia Motors er gert að greiða sektir og allan málskostnað og aflétta undireins þeim þvingunum og viðskiptahindrunum sem ábyrgðarskilmálarnir fólu í sér.
Þar sem Svíþjóð er Evrópusambandsríki er fastlega reiknað er með því að hæstaréttardómurinn hafi gildi í öðrum ríkjum sambandsins og á hinu Evrópska efnahagsvæði öllu.