Samgöngusáttmálinn byrjar á öfugum enda

Ef marka má tvo erlenda skipulagsráðgjafa byrjar samgöngusáttmáli höfuðborgarsvæðisins á öfugum enda. Ráðgjafarnir segja að besta leiðin til að draga úr umferð einkabíla sé að gera fólki kleift að sækja daglegar þarfir fótgangandi eða hjólandi í nærumhverfinu. Samgöngusáttmálinn tekur ekkert á því, heldur einblínir á að hjólreiðar og almenningssamgöngur komi í stað einkabílsins. Um þetta er fjallað í FÍB blaðinu, sem er nýkomið út.

Umræddir ráðgjafar voru hér á landi á vegum Betri samgangna ohf, en þau eru Bernt Toderian fyrrum skipulagsstjóri Vancouver og Maria Vassilakou fyrrum varaborgarstjóri Vínarborgar.

Á málþingi í Reykjavík sögðu þau að fjölbreytt nærþjónusta væri lykillinn að minni þörf fyrir einkabílinn. Fólk þyrfti að geta gengið eða hjólað á 3-5 mínútum innan hverfis til að sækja alla helstu þjónustu.

Í samgöngusáttmála höfuðborgarsvæðisins er ekki orð að finna um aukna nærþjónustu. Það er bara ferðamátinn sem ætlunin er að breyta. Fólk á að leggja einkabílnum og fara gangandi, hjólandi, með strætó eða borgarlínu. Ferðaþörfin verður þó sú sama og áður því þjónustan sem fólk þarf að sækja verður jafn dreifð og hingað til.