Sektir fyrir nagladekkjanotkun fellur í grýttan jarðveg

Þingmenn Samfylkingarinnar hafa lagt frumvarp á Alþingi um breytingar á umferðarlögum þess efnis að sveitarstjórnum verði heimilt að rukka fyrir notkun á nagladekkjum.

Í frumvarpinu er lagt til að sveitarstjórn verði gert heimilt að ákveða allt að 40 þúsund krónu gjald vegna notkunar nagladegkkja á vélknúnum ökutækju á nánar tilteknum svæðum, fyrir ákveðið tímabil eða ákveðin skipti, að höfðu samráði við Vegagerðina.

Í greinargerð með frumvarpinu segir að tilgangurinn sé annars vegar að draga úr notkun nagladekkja og vinna þannig gegn lífshættulegri svifryksmengun og hins vegar að standa straum af kostnaði sveitarfélaga vegna slits á vegum.

Samkvæmt frumvarpinu yrði ráðherra falið að setja reglugerð þar sem kveða skal á um nánari kröfur, viðmið og fyrirkomulag gjaldtöku vegna notkunar nagladekkja.

Er tekið fram í greinargerð að þar geti ráðherra til dæmis veitt undanþágu þegar notkun nagladekkja telst öryggisatriði vegna nauðsynlegra ferða umráðamanns bifreiðar um langan veg vegna búsetu eða starfa fjarri heimabyggð.

Málið hefur áður komið til umræðu en fyrir fjórum árum síðan samþykkti meirihluti umhverfis- og skipulagsráði Reykjavíkurborgar að skora á ráðherra að taka upp sérstaka gjaldtöku á þá eigendur ökutækja sem nota nagladekk undir farartæki sín.

Runólfur Ólafsson, framkvæmdastjóri Félags íslenskra bifreiðaeigenda, FÍB, segir í samtali við Fréttablaðið um frumvarpið: „Við teljum mjög varasamt að sekta eða skattleggja öryggi.“

Runólfur segir að FÍB hafi lagt áherslu á forvarnir og upplýsingar til almennings og neytenda hvað varði nagladekk og svifryk.

„Við vitum að margir þurfa ekki nagla, við vitum líka að það getur orðið til falskt öryggi en stundum þarf að nota nagla. Það borgar sig ekki að hafa rörsýn þegar svona ákvarðanir eru teknar.“

Runólfur segist fremur styðja að áhersla verði lögð á samþættar aðgerðir. Á höfuðborgarsvæðinu þurfi sem dæmi öflugri hreinsun gatna samhliða átaki um að minnka nagladekkjanotkun.

„Það eru ákveðnar aðstæður þegar nagladekk skilja milli lífs og dauða,“ bætir Runólfur við.

Ásthildur Sturludóttir, bæjarstjóri á Akureyri, tekur mjög einarða afstöðu gegn frumvarpinu í samtali við Fréttablaðið.

„Ég held að þetta fyrirkomulag yrði alveg ómögulegt, að sveitarfélögin væru með svona eftirlit, einhverja dekkjalöggu,“ segir Ásthildur.