Sókn eftir Fiat 500

Hinn nýi endurfæddi Fiat 500 höfðar greinilega til margra því gríðarlegur áhugi hefur verið fyrir bílnum um alla Evrópu frá því hann var frumkynntur með pomp og prakt í sumar.

Hér á landi er einnig greinilegur áhugi hjá mörgum þótt hann sé varla eins heitur og á meginlandi álfunnar. Á bílasýningu í Herning í Danmörku nýlega sem mun vera hins stærsta á Norðurlöndum, drógu nýir Fiat 500 sýningarbílar að sér mikinn fjölda fólks og staðfestar pantanir á bílnum streymdu inn þótt afhending hefjist ekki fyrr en 1. mars á næsta ári. í  samtali við blaðamann FDM sagði forstjóri Fiat í Danmörku að fleiri en 500 manns hefðu pantað sér nýjan Fiat 500 á sýningunni. Þess má geta að þar sem náin tengsl eru milli Fiat í Danmörku og íslenska Fiat umboðsins verður Fiat 500 örugglega ekki fyrr á ferðinni á Íslandi en í Danmörku.

Nánast enginn þeirra sem pantað hafa sér nýjan Fiat 500 í Danmörku hefur nokkru sinni haft tækifæri til að reynsluaka bílnum og dönsku kaupendurnir vita ekki einusinni hvað hann kemur til með að kosta. Eina verðið sem Fiat í Danmörku hefur getað gefið upp hingað til er að hann kosti aðeins undir 1,6 millj. Ísl. kr.

Sem fyrr segir hefst sala og afhending í Danmörku þann 1. Mars á næsta ári og eins og oft gerist með nýja bíla sem þykja eftirsóknarverðir, þá verður til hliðarinnflutningur, það sem sumir vilja kalla gráan markað sem í flestum tilfellum er rangnefni. Þannig hefur Danskt bílasölu- og rekstrarleigufyrirtæki hefur nýlega keypt 25 eintök af bílnum frá Ítalíu þar sem hann er þegar kominn í sölu. Bílarnir eru flestir eknir í kring um 500 km og ásett verð á þeim er í kring um 2,4 m. ísl. kr. fyrir bíl með 1,2 l vél og miðlungs búnaði.