Subaru loks með dísil

Subaru dísilvélarnar, fyrstu boxerdísilvélar bílasögunnar.

Subaru hefur unnið að því að þróa nýjar dísilvélar fyrir bíla sína að undanförnu og nú hefur verið tilkynnt að fyrstu dísil-Subarubílarnir komi á markað í Svíþjóð í apríl næstkomandi.

Subaru dísilvélarnar verða jafnframt þær fyrstu í bílasögunni sem eru af boxergerð, það er að segja með lárétta stimpla. Subaru hefur alla tíð haldið fast í þá hefð að bjóða bíla með boxer-bensínvélum og hafa vélarnar reynst mjög vel og verið sérlega endingargóðar. Um tvö ár eru síðan Subaru tilkynnti að dísilvélar væru á leiðinni og á bílasýningunni í Genf  fyrir tæpu ári voru fyrstu boxer dísilvélar þeirra frumsýndar.

Nýju dísilvélarnar verða í fyrstunni í Subaru Legacy og Subaru Outback. Þær verða  tveir lítrar að rúmtaki, 163 hestöfl og með 350 Newtonmetra vinnslu.