Þýski bílaiðnaðurinn vill skattana burt af „120 gramma“ bílunum

Matthias Wissmann stjórnarformaður VDA, sambands þýskra bílaframleiðenda og fyrrverandi ráðherra fjarskipta í Þýskalandi, telur að besta aðferðin við að fjölga umhverfismildum bílum sé að grundvalla bílaskatta á koldíoxíðútblæstri þeirra – því minni koldíoxíðútblástur, þeim mun lægri skattar. Þeir bílar sem gefa frá sér 120 grömm af koldíoxíði á kílómetra eða minna, verði algjörlega skattlausir.

Matthias Wissmann segir í viðtali við tímarit samtakanna að langflestir kaupendur lítilla og meðalstórra bíla í Þýskalandi séu með mánaðartekjur upp að 2 þúsund evrum. Með því að lækka skattana af sparneytnu bílunum skapist þessum hópi svigrúm til að eignast nýjan bíl og um leið nást mikilvæg markmið um minnkandi koldíoxíðútblástur frá samgöngum.