Þýski lúxusinn laut í gras fyrir alþýðuvagninum

Lúxsusbíllinn Mercedes-Benz EQS háði mjög jafna keppni við uppáhaldsbíl almúgans; Tesla Model 3 í drægnikeppni 31 rafbíls í Noregi um hver kæmist lengst á rafhleðslunni. Þetta kemur fram í vetrarrafbílarannsókn Félags norskra bifreiðaeigenda, NAF, og FÍB sem gerð var á dögunum.

Svo fór að lokum að Teslan hafði sigur og hafði komist 521 kílómetra þegar hann stöðvaðist en Benzinn 513 km. Enginn bílanna í prófuninni komst nær uppgefnum drægnitölum samkvæmt WLTP staðlinum en svo, að upp á það vantað meir en 10 prósent að meðaltali.

Hið norska systurfélag FÍB - NAF og félagstímaritið Motor stóðu að þessari vetrarprófun á rafbílum – þeirri viðamestu í heiminum hingað til og komu fleiri samtök að viðburðinum, þeirra á meðal er FÍB eins og áður kom fram. NAF og Motor hafa um árabil gert vandaðar prófanir og úttektir á rafbílum bæði að sumar- og vetrarlagi.

 Aðstæður í þessari nýju vetrarkönnun voru í stórum dráttum þær að veðurfar og færð var breytilegt, yfirborð veganna var ýmist autt, þurrt, blautt, snævi, eða ísi þakið. Hitafar á meðan prófunum stóð var þannig að sjaldan var það sem kallast brunagaddur eða hörkufrost heldur lá lofthitinn oftast á bilinu frá fáeinum plúsgráðum niður í ca. tíu gráðu frost. Prófanir fóru fram bæði á láglendi og á fjallvegum.

Eins og vænta mátti að vetrarlagi náðu rafhlöður bílanna, sem voru 31 talsins, ekki sömu nýtni og afköstum eins og sumar væri og reyndist orkueyðsla þeirra að meðaltali vel yfir 10 prósentum meiri en  uppgefin eyðsla samkvæmt WLTP staðlinum.

Mercedes-Benz EQS stöðvaðist eftir 513 km akstur. Tesla Model 3 Long Range stöðvaðist eftir 521 km akstur og BMW iX xDrive50 náði 500 km.

En það var hinn kínverski BYD Tang sem stóð sig hlutfallslega best og vantaði aðeins 11 prósent upp á að ná hinum uppgefnu 400 kílómetrum á einni rafhleðslu (hann komst 356 km).

Hin nýja Tesla Model Y stóð sig líka vel og komst 451 km en það er frávik upp á 11,05 prósent. Hér skal undirstrikað að síðustu 100 kílómetrarnir voru brattari upp í móti og hitastigið nokkru lægra en þegar BYD Tang glímdi við  sína lokaleið.

Skoðaðu töflurnar!

 Í fyrri töflunni er yfirlit yfir alla bílana í þessari vetrarprófun. Fram kemur hin uppgefna WLTP-drægnitala, tölurnar við keppnislok og frávik frá WLTP. Neðar á síðunni er svo önnur tafla þar sem skráð er staðan við hvert og eitt 50 km áfangastopp. Orkueyðslutölurnar eru skráðar sem kWh/100 km eða kílóWattstundir pr. 100 km. (Á vef NAF/Motor má finna tengla á nánari umfjöllun um einstaka bíla):

PS: Við höfum áður rekið okkur á það að í stöku tilfellum hefur innflytjendum ekki tekistað gefa réttar WLTP-upplýsinga og/eða að upplýsingar um t.d. dekkja- og hjólastærðir prófunarbílannar og ýmsan annan búnað eru ekki réttar. Að þessu sinni gerðist þetta með NIO ES8.  WLTP-drægni hans er 488 km, ekki 500, eins og okkur var fyrst sagt. Búið er að leiðrétta þetta í töflunni. Það var gert  31. janúar.

Í töflunni hér fyrir neðan eru niðurstöður sem vekja sérstaka athygli: Það eru niðurstöðurnar fyrir Skoda Enyaq iV 80 (afturhjóladrifna gerðin) sem bara komst 347 km – meir en fimmtíu kílómetrum skemmra en fjórhjóladrifna gerðin. Venjulega er þetta öfugt – að fjórhjóladrifnu gerðir bíla sömu tegundar hafa lengri drægni.  Tölurnar eru svo mikið út úr kú við það sem ætla mætti, að ákveðið hefur verið að endurtaka prófið á iV 80 á þessari sömu leið hið fyrsta.

Prófunarleiðin (keppnisleiðin) lá frá Osló, um Lygnasæter, Gjøvik, Ringebu, Dombås, Hjerkinn, Folldal og síðan suðuryfir Venabygdsfjellet til Ringebu aftur. Bílarnir sem lengst komust stöðvuðust rétt norðan við Kvam.