Tímamótabíll að verða að veruleika

Nú virðist sem skriður sé að komast á borgarbíl Formúlu- og ofursportbílahönnuðarins Gordon Murray sem sagt hefur verið frá hér á fréttavef FÍB og í FÍB blaðinu. Stórir bílaframleiðendur eru sagðir áhugasamir um að hefja framleiðslu á bílnum. (Hér lýsir Murray sjálfur bílnum).   

Gordon Murray fékk nýlega myndarlegan styrk frá breskum tækninýjungasjóði til að ljúka verkefninu sem kostað hefur samtals 9 milljónir breskra punda og staðið hefur yfir í um 17 mánuði. Tveir bílaframleiðendur hafa sýnt því áhuga að framleiða bílinn og að sögn breskra fréttamiðla er líklegt að framleiðslan hefjist í Bretlandi innan ekki svo langs tíma. Nokkrar frumgerðir hafa verið byggðar og reynsluakstur inni á lokuðum svæðum og gagnasöfnun stendur yfir. Reynsluakstur í almennri umferð hefst síðan 5. nóvember nk. í framhaldi af almennri kynningu á bílnum og verkefninu í heild, sem haldin verður á vegum RAC, hins konunglega breska bílaklúbbs.

T. 27. Ökumannssætið er fyrir miðju og til beggja handa við það sést fóta- rými fyrir aftursætafarþegana.

Bíllinn, sem nefnist T. 25 (brunahreyfill) og T. 27 (rafmótor) er þriggja manna. Sjálft verkefnið og rafútgáfan var kynnt á fréttamannafundi í höfuðstöðvum konunglega breska bílaklúbbsins fyrr í þessari viku og töluðu aðstandendur um heimsins orkunýtnasta bíl.

Þótt hönnunar- og hugmyndavinnan hafi ekki staðið lengur en 17 mánuði þá hafa menn á þeim skamma tíma hannað bíl og framleiðsluferli frá grunni og í ofanálag  rafmótorinn líka, sem er frá Zytec Automotive.

T. 27 er sérstaklega hugsaður sem borgarbíll með mikið notagildi, öruggur fyrir fólkið í honum, ódýr í kaupum og rekstri og mjög umhverfismildur. Breskir bílamenn sem skoðað hafa fyrirbærið segja að bíllinn sé ekki minni bylting en fyrsti Mini-bíllinn var á sínum tíma.

Búið er að árekstrarprófa bílinn tvisvar sinnum, nú síðast eftir aðferðafræði og vinnulagi EuroNCAP og niðurstaðan er sú að bíllinn sé mjög öruggur þótt smár sé.