Vel útbúin hópferðabifreið

Hópbílar fengu á dögunum afhenda glæsilega hópferðabifreið af gerðinni Setra S 519 HD. Bíllinn er framleiddur í verksmiðju EvoBus í Ulm í Þýskalandi og er 15 metra langur og búinn 69 farþegasætum. Sætin eru einstaklega þægileg og öll búin öryggisbeltum.

,,Í bílnum er m.a. ísskápur, USB tengi við hvert sæti og öflug loftkæling. Vinnuaðstaða bílstjóra er mjög góð og mikið lagt upp úr þægindum við akstur og öryggi ökumanns. Við hönnun þessara bíla leggja Setra verksmiðjunnar mikla áherslu á öryggi farþega og hagkvæmni í rekstri. S 519 HD bílinn þykir einstaklega vel heppnaður hvað það snertir og er rekstrarkostnaður þessa bíls talinn vera lítið hærri en á minni bílum, sem eru að rúma 50 – 58 farþega að jafnaði. Vél bílsins er rúm 400 hp Euro 6 og einstaklega hljóðlát og hagkvæm í rekstri. Þetta er mjög glæsileg og fullkomin hópferðabifreið og mun sóma sér vel í bílaflota Hópbíla," segir Sigurður Einar Steinsson, sölumaður hópbifreiða hjá atvinnubíladeild Mercedes-Benz hjá Bílaumboðinu Öskju.

Askja er umboðsaðili EvoBus á Íslandi og segir Sigurður að fyrirtækið hafi náð góðum samningum við framleiðanda og geti því boðið bíl af þessu tagi á mjög góðu verði um þessar mundir. Hann segir að tveir bílar af þessari gerð séu væntanlegir nú í sumar og einn til viðbótar á haustdögum.

,,Núna á næstu dögum verður svo til sýnis og sölu nýr Mercedes-Benz Tourismo 49 sæta hópferðabíll. Þetta hafa verið mjög vinsælir bílar hér á landi s.l. ár. Til að bregðast við mikilli eftirspurn hefur Askja pantað þennan bíl og er hann því óseldur," segir Sigurður ennfremur.

Hópbílar hf. var stofnað árið 1995 og hefur það að markmiði að bjóða upp á nýjar og nýlegar hópbifreiðar með öllum helstu þægindum og öryggi. Helstu verkefni Hópbíla hf. eru tengd ferðaþjónustu og öllum þeim sem vilja ferðast, fyrirtækjum sem og einstaklingum.

Einnig sjá Hópbílar um skólaakstur fyrir Hafnarfjarðarbæ og akstur fatlaðra á stór Reykjavíkursvæðinu undir nafni Aksturþjónustu Hópbíla. Hópbílar sjá einnig um utanbæjarakstur fyrir hönd Strætó Bs og allan akstur fyrir starfsmenn Alcan.