Volvo innkallar 251.300 bíla

 
Volvo XC 90

Volvo hefur sent frá sér tilkynningu þar sem eigendur nýlegra Volvo bíla af gerðunum XC90, S40 og V50 eru beðnir að fara þegar í stað með bílana á Volvo-verkstæði til viðgerða þeim að kostnaðarlausu. Ástæða innköllunarinnar varðandi fjórhjóladrifsbílinn XC90 er galli í stýrisbúnaði. Í S40 og V50 er innkallað vegna bensínleiðslu sem getur ofhitnað í bílum með fimm strokka bensínvélum með turbínu. Bensínleiðslan getur ofhitnað þegar túrbínan eða forþjappan við vélina er í fullri vinnslu. Um er að ræða samtals um 251.300 bíla um allan heim.

Christer Gustafsson blaðafulltrúi Volvo í Gautaborg í Svíþjóð segir við dagblaðið Dagens Industri að þessi innköllun verði fyrirtækinu talsvert dýr en vill ekki nefna upphæðir.  Inköllunin sé fyrst og fremst í öryggisskyni og gerð þótt engin dæmi séu um að slys hafi orðið vegna umræddra galla.

Hvað varðar XC 90 er innköllunin vegna galla í ytri stýrisliðum (stýrisendum) í árgerðum 2003, 2004, 2005 og árgerð 2006 að hluta. Samtals nær innköllunin til 217.000 XC 90 bíla og þar af eru tæplega 8.000 í Svíþjóð. Upplýsingafulltrúinn segir að ef mikið álag verður á stýrisbúnaðinn gætu kúluarmar í stýrisliðunum átt það til að aflagast. Það geti leitt til þess að slag eða hlaup komi í stýrið sem við það verður ónákvæmt.

34.300 bílar af gerðunum S 40 og V 50 eru innkallaðir vegna þess að bensínslanga getur hugsanlega ofhitnað og skemmst af völdum hita frá vélartúrbínunni og tekið að leka. Við það gætu komið gangtruflanir í fyrstu en svo í versta falli kviknað í bílunum. Blaðafulltrúinn segir að engin vandamál séu þekkt í sambandi við þetta en engu að síður vilji þeir Volvo-menn útiloka að vandamál geti komið upp í bílum frá þeim. Hvað varðar gerðirnar S40 og V50 þá nær innköllunin til bíla af árgerðum 2004, 2005 og 2006.