Fréttir

Á dögunum tók Evrópuþingið upp nýja reglugerð sem lýtur að gerð ökutækja. Laurianne Krid settur framkvæmdastjóri Alþjóðasamtaka bifreiðaeigenda, FIA, sagði endurskoðun á svokallaðri gerðarviðurkenningu nauðsynlega til að vinna aftur traust neytenda .

Mercedes-Benz og Höldur bjóða til Mercedes-AMG GT sýningar í Hofi á laugardaginn kl. 12–16. Þar verða sýndir fjölmargir bílar og stjarna sýningarinnar er Mercedes-AMG GT sem vakti verðskuldaða athygli á Mercedes-AMG sýningu í Reykjavík á dögunum.

Fyrsta tölublað FÍB-blaðsins á þessu ári mun berast félagsmönnum FÍB á allra næstu dögum. Blaðið er stútfullt af áhugaverðu efni eins og allan jafnan. Meðal þess sem fjallað er um í blaðinu er hugmyndin um að setja upp gjaldhlið á vegina inn og út úr Reykjavík og rukka vegtolla af vegfarendum og verja þeim til endurbóta og viðhalds í vegakerfinu sem orka mjög tvímælis.

Um þessar mundir er Stefán Ásgrímsson ritstjóri FÍB blaðsins og heimasíðu FÍB að hætta störfum á skrifstofu FÍB. Stefán hefur verið ritstjóri í fullu starfi í um 16 ár en kom áður að ritstjórn sem verktaki. Samstarfsfólk og stjórn FÍB þakkar Stefáni vel unnin störf, vináttu og ferskleika á tímum mikilla breytinga í tækni og umhverfi fjölmiðla. Stefán er nú virðulegur heldri borgari og við samferðarfólkið óskum honum velfarnaðar á nýjum vettvangi. Jón Kristján Sigurðsson hefur tekið við ritstjórastarfinu hjá FÍB. Jón er þrautreyndur blaðamaður og ritstjóri og starfaði síðast sem kynningarfulltrúi og ritstjóri Skinfaxa hjá Ungmennafélagi Íslands (UMFÍ). Stjórn og starfsfólk FÍB býður Jón hjartanlega velkominn til starfa.

Það kennir ýmissa grasa þegar rýnt er í Árbók bílgreina sem var að koma út. Í bókinni koma fram staðreyndir sem fjalla um hinar ýmsu hliðar bílgreinanna. Hlutur bílgreina í landsframleiðslu var 1,6% árið 2016 og jókst þannig um 0,1% prósentustig frá árinu á undan.

Bílakaup landsmanna fara enn vaxandi frá fyrra ári samkvæmt gögnum Samgöngustofu um nýskráningar. Alls voru 2.316 fólks- og sendibílar nýskráðir í mars, eða 823 fleiri heldur en í mars 2016. Hefur markaðurinn í heild vaxið um 29% á árinu samanborðið við fyrstu þrjá mánuði ársins í fyrra. BL er sem fyrr með langmesta hlutdeild á markaðnum, tæp 29 prósent.

Umferðin á höfuðborgarsvæðinu í mars sl. jókst um heil 14,6 prósent frá sama mánuði á síðasta ári og hefur umferðin ekki áður verið meiri í mars og heldur ekki í neinum öðrum mánuði. Þetta er því metmánuður á fleiri veg en einn. Frá áramótum hefur umferðin á svæðinu aukist um tæp 10 prósent. Reikna má með að umferðin muni aukast um sex prósent í ár. Þetta kemur fram í nýjum tölum frá Vegagerðinni.

Umferðin á Hringveginum jókst um tæp 14 prósent í nýliðnum marsmánuði. Það vekur athygli hversu mikil aukningin er í ljósi þess að fyrir ári síðan jókst umferðin enn meira í mars. Frá áramótum hefur umferðin á Hringvegi aukist um 14 prósent sem er gríðarlega mikil aukning. Þetta kemur fram í upplýsingum frá Vegagerðinni sem voru að koma út.

Allt þar til á síðasta ári var Hyundai eini bílaframleiðandinn á markaðnum sem fjöldaframleiddi rafknúna vetnisbíla. Hyundai hóf almenna sölu á vetnisknúnum ix35 í byrjun árs 2013, þar sem efnarafall framleiðir rafmagn fyrir rafmótorinn úr vetni af „eldsneytistanki“ bílsins. Vel á fimmta hundrað slíkra bíla hafa verið seldir í Evrópu.

BL kynnir á morgun, laugardag milli kl. 12 og 16 nýjan Discovery sem er hæfari og öflugri en nokkru sinni fyrr. Nýr Discovery er nú í fyrsta sinn með yfirbyggingu úr áli sem gerir hann 490 kg léttari en eldri gerð.