Fréttir

Nýr Kia e-Soul rafbíll verður frumsýndur á Bílasýningunni í Los Angeles síðar í mánuðinum. Ný kynslóð e-Soul verður talsvert breytt í hönnun sem og aksturseiginleikum frá núverandi rafbíl Soul EV.

Frá 1. október sl. hefur lögreglunni á höfuðborgarsvæðinu borist tilkynningar um innbrot í rúmlega 100 ökutæki. Um það bil helmingur þessara innbrota hafa átt sér stað í miðborginni.

Heimsmarkaðsverð af hráolíu hefur ekki verið lægra í átta mánuði. Tunnan lækkaði á mörkuðum í gær um rúmlega 6% og hefur lækkunin á einum degi ekki verið meiri síðan í byrjun júlí í sumar. Í október var tunnan á 86 dollara en í gær var tunnan komin niður í 66 dollara.

Bílaumboðið BL hefur afhent eitt þúsundasta rafbílinn frá því að fyrirtækið seldi fyrsta bílinn 12. júlí árið 2013. Það var Nissan Leaf sem nú hefur verið ekið tæpa 70 þúsund kílómetra.

Í rannsóknum sem fyrirtækið Rannsóknir og ráðgjöf ferðaþjónustunnar vann kemur í ljós að 61% erlendra gesta sem nýttu sér bílaleigubíla árið 2017 óku að meðaltali um 1.560 km þann tíma sem þeir leigðu bílana, eða um 230 km á dag að jafnaði þá 6,8 daga sem leigan stóð. Heildarakstur á hvern leigusamning var að jafnaði lengstur í júlí, um 2.100 km, en stystur í janúar, um 940 km.

Neytendastofu hefur borist tilkynning frá Brimborg ehf að innkalla þurfi dísel Ford Edge bifreiðar af árgerðunum 2015 til 2018. Um er að ræða 113 bifreiðar. Ástæða innköllunarinnar er að hersla á kúplingu fyrir loftkælingu er mögulega ekki í lagi.

Tækninni fleytir fram á ýmsum sviðum og þar er bílagreininni ekki undan skilin. Hyundai Motor Group hefur verið að koma fram með ýmsar nýjungar og nú hefur fyrirtækið kynnt áætlun um að búa þök og jafnvel vélarhlífar tiltekinna bílgerða fyrirtækisins með sólarrafhlöðum til að auka eldsneytis- og orkunýtingu og draga úr útblæstri. Von er á fyrstu bílunum með tækninni í lok næsta árs eða byrjun 2020.

Töluverð verðlækkun hefur orðið á eldsneyti á heimsmörkuðum á síðustu dögum og nemur lækkunin um 20% þegar verðið var hvað hæst í október. Um helgina lækkaði bensínverðið hér á landi um þrjár krónur lítrinn og kostar 95 oktana bensín hjá Orkunni (Skeljungi) 228,70 krónur, Atlantsolíu 228,80 krónur og hjá N1 232 krónur. Dísilolíuverðið er á flestum stöðum rösklega þremur krónum ódýrara en 95 oktana bensín og kemur það til vegna lækkunar á heimsmarkaðsverði.

Umferðin á höfuðborgarsvæðinu í október jókst um rúm fjögur prósent, það er helmingi minna en umferðin jókst í sama mánuði í fyrra en er þó töluvert yfir meðaltalsaukningu. Útlit er fyrir að umferðin í ár á höfuðborgarsvæðinu aukist um þrjú prósent.

Dagana 8. – 9. nóvember stóð Ungmennaráð Grindavíkur fyrir málþingi um umferðaröryggi en þingið bar heitið: „Umferðaröryggi - Okkar mál!“ Fulltrúum ungmennaráða á Suðurlandi og Suðurnesjum var boðið á þingið, sem og fulltrúum sveitarfélaga, þingmönnum, ráðherrum og fulltrúum þeirra stofnana/félaga sem hafa með umferðarmál að gera .