Fréttir

Toyota bílaframleiðandinn hefur orðið að grípa til þess ráðs að innkalla bíla af gerðinni Prius og Auris tvinnbíla sem framleiddir voru á árunum 2008 til 2014. Það voru fjölmiðlar í Japan sem greindu frá þessu fyrir helgina. Um er að ræða 2,5 milljónir bíla um allan heim.

Umferðin á þjóðvegum landsins hefur aukist um tæplega 40% á síðustu fimm árum. Á milli 30-40 þúsund ferðamenn fara um vegakerfið á hverjum degi og því fylgja miklar áskoranir. Þetta var sem kom m.a. fram í máli Sigurður Inga Jóhannssonar, samgöngu- og sveitarstjórnarráðherra, á Umferðarþingi sem hófst á Grand Hóteli í Reykjavík í morgun.

Umferðin á höfuðborgarsvæðinu í september jókst um 1,5 prósent en það er minnsta aukningin í einum mánuði á þessu ári. Þetta er einnig mun minni aukning en að meðaltali í september áranna 2005-2018. Umferðin á svæðinu hefur aukist í ár um 2,7 prósent sem er einungis einn þriðji þess sem aukning var á sama tíma í fyrra.

Neytendastofu hefur borist tilkynning frá BL ehf að innkalla þurfi Subaru Legacy og Subaru Outback bifreiðar af árgerðunum 2010 til 2014. Um er að ræða 137 bifreiðar.

Bandalag íslenskra bílablaðamanna (BÍBB) stendur á ári hverju fyrir vali á Bíl ársins og var valið tilkynnt við athöfn í húsnæði Blaðamannafélags Íslands í gærkvöldi. Sigurvegarinn í ár var Volvo V60. Þetta árið var 31 bíll sem uppfyllti það skilyrði að vera gjaldgengur í valinu, en bílarnir þurfa annaðhvort að vera nýir bílar eða af nýrri kynslóð.

Framkvæmdastjórn Evrópusambandsins ákvað þann 18. september sl. að hefja ítarlega rannsókn á því hvort BMW, Daimler (Mercedes Benz) og VW (Volkswagen, Audi, Porsche) hefðu átt í samráði, sem bryti í bága við auðhringareglugerð ESB, til að koma í veg fyrir samkeppni um þróun og innleiðingu á tæknilausnum til að hreinsa útblástursmengun frá bensín- og dísilbílum. Tilkynningin kemur nákvæmlega þremur árum eftir að dísilhneyksli Volkswagen – oft kallað Dieselgate – komst í hámæli.　

Stórleikarinn Robert De Niro verður sérlegur sendiherra hins nýja rafbíls Kia e-Niro og mun auglýsa hann og kynna á næstu vikum og mánuðum. Kia e-Niro verður í sviðljósinu á Alþjóðlegu bílasýningunni í París. Kia verður með margt annað spennandi í gangi á sýningunni.

Umferðin á Hringveginum í nýliðnum september mánuði jókst um tæp sex prósent sem er töluvert meira en að meðaltali í september mánuði frá því árið 2005. Aukningin er hinsvegar töluvert minni en hún hefur verið undanfarin nokkur ár. Umferðin jókst mest á Suðurlandi en hún dróst saman á Norðurlandi. Það sem af er ári hefur umferðin aukist um 4,4 prósent. Þetta kemur fram í tölum frá Vegagerðinni.

Samkvæmt tölum frá Bílgreinasambandi Íslands kemur fram að sala á nýjum bílum dróst saman um tæp 24% í september. Nýskráningar í þessum mánuði voru 935 bílar en í sama mánuði í fyrra voru nýskráningar 1.266.

Þjófar fara undir Volvo jeppa á bílastæði, klippa á rafkapla og skrúfa driftölvu lausa. Bílar í dag eru flóknir tæknilega og með stöðugt meiri, flóknari og dýrari búnað og íhluti. Bíræfnir þjófar sjá tækifæri í því að stela dýrum íhlutum enda eftirspurnin töluverð. Þegar bílar eldast geta tölvur, skynjarar og þægindabúnaður bilað. Bílþjófar í Evrópu hafa í vaxandi mæli snúið sér að því að stela hlutum úr bílum, eins og dýrum ljósum, loftpúðum, tölvum, stjórnbúnaði, hvarfakútum, felgum og jafnvel heilu mælaborðunum.