Fréttir

Umferðin á höfuðborgarsvæðinu í nóvember jókst um 4,4 prósent um þrjú mælisnið Vegagerðarinnar. Umferðin í ár hefur aukist um 3 prósent sem er þrisvar sinnum minni aukning en í fyrra á sama tíma. Þannig hægir verulega á aukningunni í umferðinni á höfuðborgarsvæðinu. Þetta kemur fram í tölum frá Vegagerðinni.

Það ríkti mikil tilhlökkun í vikunni þegar þau Guðmundur Sigurhansson og Margrét Runólfsdóttir á Icelandair Hóteli opnuðu fyrstu ON-hlöðuna á Flúðum með því að hlaða Hyundai Kona EV, fyrsta rafknúna smájeppann í Evrópu.

Ólögleg notkun á farsímum undir stýri minnkar á milli ára en notkun á handfrjálsum búnaði eykst. Þetta sýna niðurstöður könnunar MMR á farsímanotkun landsmanna undir stýri sem framkvæmd var dagana 8.-12. nóvember 2018.

Ákvörðun þess efnis að fresta afgreiðslu samgönguáætlunar til 1. febrúar á næsta ári hefur verið samþykkt af formönnum allra flokka á Alþingi. Ljóst var að tíminn fram að jólum var allt of knappur til að afgreiða jafn stórt mál sem samgönguáætlunin er. Upphaflega var stefnt að því að afgreiða áætlunina og hún yrði samþykkt fyrir áramót. Áætlunina þarf að ræða betur ofan í kjölinn og á þá sættust formenn þingflokka á Alþingi í gærkvöldi.

FÍB mótmælir yfirstandandi hraðferð vegtolla í gegnum Alþingi. Þessum nýju sköttum á bíla og umferð á bersýnilega að þröngva í gegn á sem stystum tíma til að koma í veg fyrir lýðræðislega umræðu. Þessi vinnubrögð eru fullkomlega óboðleg.

Stefnt er að formlegri opnun Vaðlaheiðarganga 12. janúar næstkomandi. Svo gæti farið að hægt væri að opna göngin í lok þessa mánaðar en það ræðst að því hvernig til tekst með lokafrágang ganganna. Vegggjöld verða innheimt rafrænt en ekki í gjaldskýli.

BMW Group Thailand, dótturfélag BMW í Þýskalandi hefur ákveðið að hefja eigin framleiðslu á rafhlöðum fyrir rafbíla BMW og MINI á Asíumarkaði til að mæta vaxandi eftirspurn almennings á markaðssvæðinu eftir raf- og tengiltvinnbílum BMW og MINI. Markaðshlutdeild BMW Group í Asíu fer mjög vaxandi um þessar mundir og var salan fyrstu níu mánuði ársins tæpum sextán prósentum meiri en á sama tímabili 2017.

Sala á rafbílum gengur hvergi betur en í Noregi en í dag eru þeir hátt í 150 þúsund talsins. Í upphafi þessarar viku náði Nissan þar merkum áfanga en nú hafa fimmtíu þúsund Nissan Leaf verið seldir þar í landi. Fyrsti Nissan Leaf kom á götuna í Noregi 2011 og hefur síðan notið mikilla vinsælda. Það stefnir allt í að yfir 15 þúsund Nissan Leaf verði seldir á þessu ári í Noregi en bara í marsmánuði einum seldust á þriðja þúsund bílar.

Nemendum í10. bekk við Foldaskóla í Grafarvogi stendur til boða valgrein við skólann sem nefnist fornám til ökunáms. Í þessu fagi er farið yfir öryggi og ýmsa þá þætti sem tengjast bílnum.Hjörtur Gunnar Jóhannesson, starfsmaður FÍB aðstoðar, heimsótti Foldaskóla í vikunni og fræddi nemendurna um allt sem snýr að dekkjaskiptum Einnig fór fram kennsla í því hvernig maður tengir startkapla og gefur straum

Í greiningu Samtaka iðnaðarins sem gerð var í tilefni af mótun samgönguáætlunar fyrir höfuðborgarsvæðið árin 2019-2033 kemur fram að samtökin áætla að þjóðhagslegur kostnaður umferðatafa á höfuðborgarsvæðinu árið 2017 hafi verið yfir 15 milljarða króna. Þetta kemur fram í Morgunblaðinu í umfjöllun um málið. Þar segir ennfremur að þar hafi atvinnulífið tapað um sex milljörðum króna vegna tapaðs vinnutíma og almenningur um níu milljörðum vegna tapaðs frítíma.