Fréttir

Runólfur Ólafsson, framkvæmdastjóri Félags íslenskra bifreiðaeigenda, FÍB, fagnar áformum Reykjavíkurborgar um að fækka bensínstöðvum um helming á næstu árum.Runólfur telur að fækkunin hafi í för með sér lægra eldsneytisverð. Þetta kom fram í máli hans á Morgunvaktinni á Rás 1 í morgun.

Sáttmáli um gagnkvæman skilning atvinnubílstjóra og hjólreiðafólks í umferðinni hefur verið gerður. Markmið sáttmálans er að auka gagnkvæman skilning og koma í veg fyrir slys, því mikilvægast af öllu er að tryggja öryggi allra vegfarenda.

Neytendastofu hefur borist tilkynning frá Bílaumboðinu Öskju ehf um að innkalla þurfi KIA Niro bifreiðar. Um er að ræða 132 bifreiðar af undirtegundunum DE, HEV og PHEV

Síðastliðið haust fékk EFLA verkfræðistofa nýjan búnað til að gera ítarlegar greiningar á umferð. Búnaðurinn var notaður í rannsókn þar sem umferð á gatnamótum Kringlumýrarbrautar og Háaleitisbrautar var skoðuð. Meðal þess sem kom fram var að 24 af hverjum 10.000 bílum reyndust aka gegn rauðu ljósi.

Á Kanaríeyjum býr ungur byggingarverkfræðingur, ættaður frá hafnarborginni Busan í Suður-Kóreu, sem hyggst „klára heimsreisu“ föður síns sem sigldi frá Busan einn síns liðs til Spánar fyrir um fjörutíu árum og ílengdist þar þótt ætlunin hefði verið að sigla umhverfis jörðina aftur heim til Busan.

Umferðin á höfuðborgarsvæðinu í apríl dróst saman um 2,6 prósent og hefur það ekki gerst síðan árið 2014. Umferðin á svokölluðum gráum degi - þegar búist var við miklu svifryki og frítt var í strætó - reyndist tíu prósentum meiri en að meðaltali á mánudögum í apríl. Grái dagurinn bar upp á mánudag. Þetta kemur fram í tölum frá Vegagerðinni.

Dagana 3. til 13. maí sl. vann Gallup skoðanakönnun að beiðni Samgöngufélagsins þar sem spurt var: Hversu hlynnt(ur) eða andvíg(ur) ert þú hóflegri gjaldtöku fyrir notkun nagladekkja á höfuðborgarsvæðinu? Af þeim 818 sem tóku afstöðu voru örlitlu fleiri sem voru (alfarið, mjög eða frekar) hlynntir heimild til gjaldtöku eða 41.9% en þeir sem voru (alfarið, mjög eða frekar) andvígir en það voru 39,9%. 18,2% þátttakenda var hvorki með eða móti.

Lögreglan á höfuðborgarsvæðinu hóf í gær að sekta þá ökumenn sem enn eru á nagladekkjum. Eitthvað er um það að bílar séu á nagladekkjum og í eftirliti lögreglunnar í gær voru einhverjir sektaðir.

Umferðin á Hringveginum í apríl jókst um tæp tvö prósent í apríl sl. Athygli vekur að umferð um Suðurland dróst saman um fimm prósent en mikil aukning hefur verið á Suðurlandi mörg undanfarin ár. Búast má við að umferðin í ár aukist um 2,6 prósent. Þetta kemur fram í tölum frá Vegagerðinni.

Bensínstöð Orkunnar norðan við Miklubraut breytist í dag í fyrstu fjölorkustöð landsins þar sem ökumenn og aðrir notendur munu, auk hefðbundins jarðefnaeldsneytis, geta keypt nær alla endurnýjanlega orkugjafa sem framleiddir eru til samgangna í landinu. Um sögulegan atburð var að ræða í orkusögu landsins því þetta var í fyrsta skipti sem slíkt er gert á einni og sömu áfyllingarstöðinni.