Fréttir

Ákæra í máli bílaleigunnar Procar var þingfest í Héraðsdómi Reykjavíkur í morgun. Haraldur Sveinn Gunnarsson, framkvæmdastjóri bílaleigunnar, er einn ákærður. Hann játaði sök við rannsókn málsins en hann mætti ekki fyrir dóminn. Haraldur Sveinn er ákærður fyr­ir skjalafals og til vara fjár­svik. RÚV greindi fyrst frá.

Lilja Alfreðsdóttir, viðskiptaráðherra, segir afar brýnt að olíufélögin hér á landi taki þátt í baráttunni gegn verðbólgu og skili verðlækkun á heimsmarkaði til íslenskra neytenda. Olíufélögin hafi ekki gefið fullnægjandi skýringar á verðmun hér og í Danmörku. Þetta kom fram í máli ráðherra í viðtali í kvöldfréttum Ríkissjónvarpsins.

Páll Gunnar Pálsson, forstjóri Samkeppniseftirlitsins segir að eldsneytisverð gæti verið lægra hér ef samkeppnin væri meiri. Verðið sé hátt í alþjóðlegum og evrópskum samanburði þegar opinber gjöld hafa verið dregin frá. Þetta kemur fram í viðtali við Gunnar Pál á ruv.is

ISBAND umboðsaðili Jeep, RAM og Fiat á Íslandi, efnir til fjölbreyttrar og glæsilegrar bílasýningar laugardaginn 15. apríl. Sýningin er í sýningarsal ÍSBAND að Þverholti 6 í Mosfellsbæ og verður opin frá kl. 12:00 – 16:00

Tillögur stýrihóps um endurskoðun á vetrarþjónustu voru kynntar í umhverfis- og skipulagsráði Reykjavíkurborgar í gær. Hlutverk stýrihópsins var að greina hvar þörf er á breytingum til að stuðla að skilvirkari þjónustu og hagkvæmni í rekstri. Fram kemur að ljúka á snómokstri, að jafnaði, innan tveggja sólarhringa eftir að snjókomu lýkur.

Níu létust í umferðinni í fyrra í jafnmörgum slysum, þar af átta karlar og ein kona. Fólkið var á aldrinum 19 til 74 ára. Fjórir voru í bifreið, einn á rafhlaupahjóli og fjórir gangandi. Þá létust fimm innan þéttbýlis en fjórir utan þéttbýlis.

FÍB undrast hvernig Þórður Guðjónsson, forstjóri Skeljungs, reynir að afvegleiða umræðu um óeðlilega hátt bensínverð hér á landi með þeim ummælum að hér á landi séu ekki reknar olíuhreinsistöðvar. Því sé ekki rétt að miða útsöluverð á eldsneyti við verðsveiflur á heimsmarkaðsverði hráolíu. Þessu hélt Þórður fram í viðtali við RÚV þann 10. apríl.

Framkvæmdir við Suðurlandsveg, Hringveg (1), milli Hveragerðis og Selfoss eru á lokametrunum og vonast er til að hægt verði að hleypa umferð á þann kafla sem enn er eftir um miðjan maí. Það fer þó eftir veðri hvenær hægt verður að malbika síðasta spottann.

Eftir að nýja skoðunarhandbókin tók gildi 1. mars sl.voru 130 ökutæki sett í akstursbann í mars mánuði einum að aflokinni lögbundinni skoðun samkvæmt upplýsingum frá Samgöngustofu og fram kemur í Morgunblaðinu. Þetta er nærri tvöföldun milli ára en 64 ökutæki voru kyrrsett í mars í fyrra. Harðara er tekið á ýmsum atriðum við skoðun bíla en verið hefur.

Ný lög um leigubifreiðaakstur nr. 120/2022 tóku gildi 1. apríl sl. Markmiðið með lögunum er að tryggja gott aðgengi að hagkvæmri, skilvirkri og öruggri leigubifreiðaþjónustu fyrir neytendur á Íslandi. Þá er lögunum ætlað að tryggja að íslenska ríkið uppfylli skuldbindingar sínar samkvæmt samningnum um Evrópska efnahagssvæðið (EES-samningnum).