Fréttir

Á hluthafafundi Sjóvár þann 19. október síðastliðinn var samþykkt að greiða hluthöfum félagsins 2,5 milljarða króna til að „laga fjármagnsskipan félagsins“ eins og segir í fundargerðinni. Á mæltu máli þýðir þetta að Sjóvá hafði safnað mun meiri fjármunum í sjóði sína en þurfti til að standa undir tryggingastarfseminni.

Dælan kom fram á sjónarsviðið í júní 2016, þegar N1 stofnaði nýtt vörumerki fyrir þrjár af sjálfsafgreiðslu eldsneytisstöðvum sínum á höfuðborgarsvæðinu. Þessar stöðvar seldu eldsneyti sem keppti við verðlagningu þáverandi Orkan X stöðva. Orkan X var undirmerki Orkunnar sem er vörumerki í eigu Skeljungs. Orkan X stöðvarnar voru afsláttarlausar og buðu oftast lægsta eldsneytisverðið á markaðnum jafnvel þó tekið væri tillit til afslátta annarra stöðva.

Samkeppniseftirlitið hefur sett upp sérstaka upplýsingasíðu um samkeppnisreglur fyrir hagsmunasamtök atvinnugreina. Á vefsíðunni segir að tilgangur hennar sé að koma í veg fyrir að starf hagsmunasamtaka fyrirtækja skaði samkeppni.

Samkeppniseftirlitið hefur hugsanlegt brot Samtaka fjármálafyrirtækja (SFF) á samkeppnislögum til meðferðar. Nánar er fjallað um málið í nýjasta hefti FÍB blaðsins. Allt bendir til að SFF hafi brotið freklega gegn sátt við Samkeppniseftirlitið um að taka ekki þátt í opinberri umræðu um verðlagningu tryggingafélaganna eða gagnrýni á gjaldtöku þeirra. Framkvæmdastjóri SFF birti grein á Vísi þar sem hún réttlætti hækkun iðgjalda og andmælti gagnrýni FÍB á gjaldtökuna.

Í nýútkomnu FÍB blaði er fjallað um hvernig Samkeppniseftirlitið geti beitt afli sínu til að afhjúpa þá leynd sem hvílir yfir iðgjaldaákvörðunum tryggingafélaganna. Staðreyndin er sú að engin leið er fyrir FÍB eða almenning að gera einfaldan verðsamanburð á iðgjöldum bílatrygginga. Tryggingafélögin gera aðeins tilboð til einstaklinga og fyrirtækja.

Í reglum Seðlabankans fyrir tryggingafélög og önnur fjármálafyrirtækjum eru ákvæði um eðlilega og heilbrigða viðskiptahætti. Reglunum er meðal annars ætlað að efla traust og trúverðugleika á fjármálamarkaði. Ætla mætti að fjármálaeftirlit Seðlabankans hefði áhyggjur af því hvernig iðgjaldaokur tryggingafélaganna rýrir þetta traust og þennan trúverðugleika.

Í svörum fjármálaeftirlits Seðlabankans við fyrirspurnum FÍB blaðsins segist eftirlitið ekki taka „efnislega afstöðu til fullyrðinga“ um að iðgjöld tryggingafélaga hafi hækkað úr hófi fram, umferðarslysum fækkað að að iðgjöld bílatrygginga séu lægri á hinum Norðurlöndunum en hér. Þetta eru engar fullyrðingar af hálfu FÍB. Þetta eru beinharðar staðreyndir frá Hagstofunni og Samgöngustofu, svo og eigin samanburðarrannsóknum félagsins. En fjármálaeftirlitið kannast ekki við þetta.

Umsókn um útgáfu fullnaðarskírteinis til ökuréttinda er nú orðin stafræn og hægt að sækja um á Ísland.is. Þá geta ökukennarar nú einnig gengið frá akstursmati með stafrænum hætti. Þetta er fyrsti liður í mikilvægu umbótaverkefni um að gera umgjörð fyrir almennt ökunám stafræna frá upphafi til enda að því fram kemur í tilkynningu á vef samgöngu- og sveitarstjórnarráðuneytisins.

Tesla hefur nú tryggt að hringvegurinn er fær þeim sem vilja notast við ofurhleðslustöðvar Tesla. Tesla opnaði fyrir skemmstu stöðvar á Höfn og á Akureyri sem þýðir að Hringvegurinn er orðinn greiðfær, aldrei meira en 300 km. á milli ofurhleðslustöðva.

Samkvæmt tölum frá Samgöngustofu voru flestar nýskráningar í október í Hyundai bifreiðum, alls 122. Toyota bifreiðar komu í næsta sæti með 84 bíla og Volvo var í þriðja sæti með 71. Nýskráningar fólksbifreiða voru alls 1020 í október en það sem af er árinu eru þær alls orðnar 10.658. Yfir sama tímabil í fyrra voru þær 8.008 og nemur aukningin um 32%.