Fréttir

Umferðin í júní á höfuðborgarsvæðinu jókst um 1,2 prósent sem kom á óvart en þetta er fyrsti mánuður þessa árs þar sem umferðin í mánuðinum er meiri en umferðin í sama mánuði ári fyrr. Þetta kemur fram í tölum frá Vegagerðinni.

Gullinbrú verður malbikuð að nýju síðdegis í dag, fimmtudaginn 2. Júlí, en vegkaflinn var fræstur mánudaginn 29. júní þar sem nýlögn á veginum stóðst ekki staðla um viðnám.

Umferðin á Hringvegi í júní dróst saman um níu prósent í júní sem er mjög mikill samdráttur. Mestur varð samdrátturinn á Mýrdalssandi þar sem 62 prósentum færri ökutæki fóru um teljarann en í sama mánuði fyrir ári. Frá áramótum hefur umferðin dregist sama um 14 prósent að því fram kemur í upplýsingum frá Vegagerðinni.

Í júní seldust 824 nýir fólksbílar, eða 39,4% færri bílar en í júní í fyrra. Á fyrstu 6 mánuðum ársins hafa selst 4193 nýir fólksbílar, eða 42,5% færri en á sama tímabili í fyrra. Þetta kemur fram í upplýsingum frá Bílagreinasambandinu þegar sölutölur fyrir fyrstu sex mánuði ársins liggja fyrir.

Frá og með deginum í dag er hægt að sækja um og fá stafræn ökuskírteini í símann. Hægt er að nálgast þau á upplýsingaveitunni Ísland.is með því að nota rafræn skilríki. Stafræna ökuskírteinið gengur hvort tveggja fyrir Android- og iOS-stýrikerfi og góðar leiðbeiningar fylgja með umsóknarferlinu.

Volvo stendur frammi fyrir stórri framkvæmd á næstunni en innkalla þarf mögulega rúmlega tvær milljónir bíla frá sænska framleiðandanum vegna galla í bílbeltum í framsætum. Um er að ræða tegundirnar Volvo S60, S60L, S60CC, V60, V60CC, XC60, V70, XC70, S80 og S80L sem voru framleiddar á milli 2006 og 2019.

Óformum þýska bílaframleiðandans Volkswagen um byggingu nýrrar verksmiðju í Tyrklandi hefur verið hætt. Í áætlunum fyrirtæksins var að ráðast í byggingu verksmiðju á næsta ári og voru viðræður við tyrknesk stjórnvöld í gangi.

Samgönguáætlun til fimmtán ára 2020-2034 og aðgerðaáætlun til fimm ára 2020-2024 voru samþykktar samhljóða á Alþingi í vikunni. Um er að ræða uppfærða og endurskoðaða samgönguáætlun á grunni þeirrar sem samþykkt var á Alþingi í febrúar 2019.

Sniglar – Bifhjólasamtök lýðveldisins komu saman til til fjölmenns samstöðufundar við húsnæði Vegagerðarinnar í Borgartúni eftir hádegi í dag. Efnt var til fundarins vegna banaslyss á Kjalarnesi sl sunnudag þar sem ökumaður og farþegi bifhjóls biðu bana í árekstri við húsbíl sem rakið er til hálku sem myndaðist á nýlögðu malbiki.

Bif­hjóla­sam­tök lýðveld­is­ins, Snigl­ar, efna í dag til samstöðufundar við hús Vegagerðarinnar í Borgartúni. Samstöðufundurinn er haldinn vegna banaslyss á Kjalarnesi sl sunnudag þar sem ökumaður og farþegi bifhjóls biðu bana í árekstri við húsbíl.